ثانوية عامة في.. البلكونة!
أثناء امتحانات الثانوية العامة
الأم تلتهم أصابعها من القلق وهي تنظر إلى الساعة المعلّقة على الحائط قبل أن تلكز زوجها في عنف، وهي تقول له في عصبية:
يا راجل قوم اتلحلح.. إنت قاعد هنا ومبسوط قوي وكأنك "حسن شحاتة" لما فاز
بالبطولة الإفريقية، والواد اتأخر عن ميعاده نص ساعة.. قوم فز!
يضع الأب الجريدة إلى جواره قبل أن يقوم من مكانه مفزوعا وهو يقول:
يا ستي إيه اللي حصل يعني لما الواد اتأخر شوية؟.. مش جايز مش عاوز يرجع
البيت عشان ماتعمليلوش فيها رئيس سجن أبو غريب، وتنزلي معاه في تحقيق
وتعذيب، وكأن الواد كان شغال مع "صدام" مش راجع من امتحان!
تضرب الأم بكف يدها على المنضدة وهي تصيح:
انزل شووووووووووووووفه!
يصبح الأب في ثانية واحدة عند باب الشقة الذي يفتحه وهم يهمهم:
"حسبنا الله ونعم الوكيل"
يفاجأ بولده يدخل عليهم الشقة وهو في حالة صمت ووجوم بالغَيْن.. يدخل إلى
المنزل وكأنه قادم من تشييع جنازة صديق مقرب له.. تقترب منه الأم في خوف،
ثم تربت على كتفه وهي تسأله في جزع:
"مالك يابني؟.. إيه اللي حصل؟.. اوع تزعّل نفسك.. حليت وحش في الامتحان.. تغور الثانوية العامة.. ولا يهمك"..
يتركها الابن في هدوء.. ثم يتجه بخطوات متسارعة إلى الشرفة.. ليفتحها في سرعة قبل أن يعتلي السور وسط صراخ والدته ووالده و.....
****
خبر في جريدة:
انتحار طالب بسبب صعوبة امتحانات الثانوية العامة!!!
****
يوم إعلان نتيجة الثانوية العامة
الأم تلتهم أصابعها من القلق وهي تنظر إلى الساعة المعلّقة على الحائط قبل أن تلكز زوجها في عنف، وهي تقول له في عصبية:
يا راجل قوم اتلحلح.. أنت قاعد هنا ومبسوط قوي وناقص تجيب ربابة وتغني..
والواد اتأخر عن ميعاده نص ساعة.. والزغاريد بترن في كل حتة في الشارع.
يضع الأب الجريدة إلى جواره قبل أن يقوم من مكانه مفزوعا وهو يقول:
يا ست إيه اللي حصل يعني لما الواد اتأخر شوية؟.. ما تلاقيه فرحان ومزقطط
مع زمايله.. شوية وهتلاقيه داخل عليك بإزازة بيبسي ومعاها 3 شاليموه
كمان.. اهدي بس اهدي!
يتناهى إلى أسماعهما صوت صراخ وزغاريد، فتتوتر الأم أكثر، فتجذب الأب من مجلسه وهي تقول له:
شاليموه! بأقولك قوم دور عليه دلوقتي وإلا أنا اللي هأعملَك عصير وهأشرَبك من غير شاليموه فعلا!
ينتفض الأب من كرسيه، ثم يتحرك نحو الباب وهو يبرطم، وقبل أن يمسك الأكره
يجد الابن يدخل عليهم وعلى فمه نصف ابتسامة، فينظر الأب إلى الأم وهو يقول:
شفتي؟.. أهو جه وجايب البيبسي كمان معاه.. بس فين الشاليموه يا حبيبي؟!
يضع الابن زجاجة البيبسي على المنضدة وإلى جوارها ورقة بها درجاته المتوسطة.. قبل أن يتجه إلى البلكونة وهو يردد:
جبت 56%.. مش عارف أدخل بيهم حمام بلدي دول ولا إيه؟!.. أنا مخنوق.. مخنوق.. مخنووووووووووووووق!
****
خبر في جريدة:
انتحار طالب بسبب حصوله على مجموع ضعيف في الثانوية العامة!!!
****
زي ما أنت شايف..
الانتحار بالنسبة لطلاب الثانوية العامة أصبح تقريبا "عادة يومية"!
واحد يطلع من الامتحان وهو ما حلش كويس..
ينتحر!
واحد جاب مجموع قليل..
ينتحر!
مش بعيد واحد يصحى من النوم ينتحر على اعتبار إن الانتحار ده بقى مادة أساسية في منهج الثانوية العامة!
كل ده رغم إن الثانوية العامة دي حضرتك مرحلة في حياة البني آدم..
طب والله مرحلة..
ومين خلق السماوات والأرض مرحلة..
يعني عادي جدًّا إن الواحد يدخلها وينجح أو يسقط أو يجيب مجموع نص نص..
هيكمل أكيد حياته بعدها..
وأكبر دليل على كده إن فيه كتير من اللي بيجيبوا مجاميع كبيرة في الثانوية العامة بيفشلوا في الجامعة وفي حياتهم العملية..
وبالعكس....
يعني الثانوية العامة خطوة واحدة بس في مشوار الواحد..
خطوة ممكن تزقه لقدام صحيح بس ممكن بعد كده -على حسب شخصيته واجتهاده- يرجع على حِسّها عشرات الخطوات للخلف..
وخطوة ممكن ترجعه لورا كام خطوة شوية بس بعد فترة ممكن يجمع شتات نفسه ويكون أحسن.. أحسن بكتير..
لاحظ إن الكلام ده تقريبا مش بيحصل إلا في مصر
عمرك سمعت عن طالب انتحر في أمريكا عشان جاب 50%!
تفتكر السبب في ده إيه؟
ليه المصريين بيتعاملوا مع الثانوية العامة
وكأنها اللحظة الأخيرة قبل القيامة؟..
مفيش بعدها يا إما جنة يا إما نار؟!!
وإزاي ممكن نعالج الحالة دي؟
يا ريت تكتبوا وتقولوا لنا رأيكم
بس رجاءً بعيد عن البلكونة إياها!.....
وماتنساش تكتب رأيك
الإثنين 09 فبراير 2009, 00:58
